បារាំង៖ វគ្គផ្តាច់ព្រ័ត្រនៃព្រឹត្តិការណ៍ប្រណាំងកង់ Tour De France ដែលជាទម្លាប់តែងតែធ្វើឡើងនៅ ហ្សង់ អេលីសេ ទីក្រុងប៉ារីស នឹងត្រូវផ្លាស់ប្តូរទៅធ្វើទៅនៅទីក្រុង ណីស៍ ដែលស្ថិតនៅភាគខាងត្បូង ប្រទេសបារាំងជំនួសវិញ នៅក្នុងឆ្នាំ២០២៤។ ការប្រកាសព័ត៌មាននេះជាផ្លូវការដោយអភិបាលក្រុងណីស៍ កាលពីម្សិលមិញនេះ ខណៈមូលហេតុត្រូវបានគេដឹងថា ដោយសារទីក្រុងប៉ារីស ជាប់រវល់ក្នុងការរៀបចំជាម្ចាស់ផ្ទះព្រឹត្តិការណ៍កីឡាអូឡាំពិក ឆ្នាំ២០២៤។
អភិបាលក្រុងណីស៍ លោក Christian Estori បានថ្លែងក្នុងសន្និសីទសារព័ត៌មានថា៖ “ជាមួយអារម្មណ៍រំភើបមួយ ខ្ញុំសុំប្រកាសជាផ្លូវការថាវគ្គផ្តាច់ព្រ័ត្រនៃព្រឹត្តិការណ៍ប្រណាំងកង់ Tour De France ឆ្នាំ២០២៤ នឹងធ្វើឡើងនៅទីក្រុង ណៃស៍។
គួរបញ្ជាក់ថា វគ្គផ្តាច់ព្រ័ត្រនៃព្រឹត្តិការណ៍ប្រណាំងកង់ធំជាងគេក្នុងពិភពលោកនេះ មិនដែលប្តូរពីទីក្រុងប៉ារីសឡើយក្នុងរយៈពេល ១០០ឆ្នាំចុងក្រោយ ដែលឆ្នាំ២០២៤ នេះជាលើកដំបូងដែលវគ្គផ្តាច់ព្រ័ត្រធ្វើឡើងក្រៅទីក្រុងប៉ារីស ត្បិតទីក្រុងនេះនឹងរៀបចំខ្លួនទទួលស្វាគមន៍ព្រឹត្តិការណ៍កីឡាអូឡាំពិករដូវក្តៅ ដែលនឹងចាប់ផ្តើមប៉ុន្មានថ្ងៃប៉ុណ្ណោះក្រោយបញ្ចប់ព្រឹត្តិការណ៍ Tour De France។
គួរបញ្ជាក់ថា ទីក្រុងណីស៍ដែលជាទីក្រុងទេសចរណ៍ឆ្នេរមួយរបស់បារាំង ក៏ធ្លាប់ជាទីតាំងបើកព្រឹត្តិការណ៍នេះកាលពីឆ្នាំ២០២០ ផងដែរ ដែលពេលនោះបញ្ហាភ្លៀងធ្លាក់ខ្លាំងធ្លាប់បង្កជាឧបសគ្គដល់ការរៀបចំការប្រកួតផងដែរ ដោយពេលនោះកីឡាករប្រណាំងកង់របស់បារាំង Thibaut Pinot បានរងរបួសនៅប្រហែលជិត ៣គីឡូម៉ែត្រមុនដល់ទីព្រ័ត្រ៕
